पुणे : बँक ऑफ बडोदाने शेतकऱ्यांसाठी एक ऑक्टोबर ते १६ ऑक्टोबर दरम्यान बडोदा किसान पंधरवड्याचे आयोजन केले असून, त्याअंतर्गत शेती क्षेत्रातील कर्जाचे प्रमाण वाढवण्याचा आणि शेतकऱ्यांचे उत्पन्न दुप्पट करण्याचा उद्देश आहे,’ अशी माहिती बँकेच्या पुणे परिमंडळाचे प्रमुख के. के. चौधरी यांनी पत्रकार परिषदेत दिली. या वेळी पुणे परिमंडळाचे उपप्रमुख हरीश चंद, पुणे शहर विभागाचे प्रमुख डी. के. पंचोरी उपस्थित होते.
‘बँक ऑफ बडोदाने गेल्या वर्षी देशभरात बडोदा किसान पंधरवडा हा उपक्रम सुरू केला होता, त्याला प्रचंड यश मिळाले होते. बँकेच्या विविध शाखांद्वारे आयोजित करण्यात आलेल्या या उपक्रमामुळे दोन लाख ४० हजार ८१७ शेतकऱ्यांचा फायदा झाला होता. या वर्षीही हा उपक्रम आयोजित करण्यात आला आहे. जागतिक अन्न दिवसाचे औचित्य साधून १६ ऑक्टोबर रोजी या उपक्रमाची सांगता केली जाणार आहे. ‘बडोदा किसान दिवस’ उपक्रमाअंतर्गत बँकेच्या शाखांद्वारे वेगवेगळे उपक्रम आयोजित केले जातात. त्यामध्ये शेतकरी मेळावे, गावात रात्रीच्या बैठका, शेतकरी तसेच गायीगुरांसाठी आरोग्य तपासणी शिबिरे, आर्थिक साक्षरता शिबिरे, शेतकऱ्यांचा सत्कार आदी कार्यक्रमांचा समावेश आहे,’ असेही चौधरी यांनी सांगितले.
‘बँकेने शेतकऱ्यांसाठी ‘बरोडा किसान’ हे विशेष अॅप तयार केले असून, त्याद्वारे शेतकऱ्यांना कर्ज सुविधा, खाते, कीटकनाशके खरेदी, तज्ज्ञांचा सल्ला, मृदा तपासणी, शेतीसंबधी मार्गदर्शन आदी सुविधा उपलब्ध आहेत,’ अशी माहिती चौधरी यांनी या वेळी दिली.
‘या अॅपला ग्राहकांचा त्याला चांगला प्रतिसाद मिळत आहे. सध्या हे अॅप अँड्रॉइड मोबाइल्सवर उपलब्ध असून, लवकरच आयओएस मोबाइल्सवर उपलब्ध होईल; तसेच सध्या इंग्रजी, हिंदी आणि गुजराती भाषेत उपलब्ध असलेले हे अॅप लवकरच अन्य १५ स्थानिक भाषांमध्ये उपलब्ध होईल,’ असेही चौधरी म्हणाले.
